Tómstund/Frístund

Tómstunda og íþróttastarf í Reykhólahreppi er starfrækt allt árið. Tómstunda og íþróttastarf er unnið í samstarfi milli félagsmiðstöðvarinnar Skrefið, ungmennafélagið Aftureldingu og hestamannafélagið Glað. Á veturna er það að hluta til í samstarfi við skólann.

Tómstundastarf heyrir undir tómstundafulltrúa sveitarfélagsins sem er Marie-Susann Zeise. Netfang: marie@reykholar.is

Öllum helstu upplýsingum um Tómstunda og íþróttastarf í Reykhólahreppi er miðlað á facebook síðu sem tómstundafulltrúi heldur úti.

Opnanir

Opnanir félagsmiðstöðvarinnar verða tvisvar í viku og horft verður á samfelldan dag barnsins svo ekki komi bil í dagskrá barnsins. 

Yngsta stig: 

Yngsta stig mætir í frístund tvisvar í viku. Á þriðjudögum og fimmtudögum er boðið upp á frístundastarf eftir hádegi þar til skólabílarnir fara heim (þriðjudaga frá kl. 12:30-15:00 og fimmtudaga frá kl. 13:10-15:00). Innan dagskrárinnar eru meðal annars hreyfileikir, leikir, tónlist, list og föndur. Þegar vel viðrar eyðum við tíma úti í fersku lofti með börnunum.

Miðstig:

Miðstigið er í tómstundastarfi tvisvar í viku, á þriðjudögum og fimmtudögum, frá því skóla lýkur og til kl. 17:00 (þriðjudaga frá kl. 14:00-17:00 og fimmtudaga frá kl. 15:00-17:00).

Unglingastig:

Unglingastig er með opið í félagsmiðstöðinni tvisvar í viku, á þriðjudögum og fimmtudögum, frá því skóla lýkur og til kl. 17:00 (þriðjudaga frá kl. 15:00-17:00 og fimmtudaga frá kl. 15:00-17:00).

Miðstig og unglingastig hafa aðstöðu í félagsmiðstöðinni. Innan þeirrar dagskrár er boðið upp á fjölbreytta starfsemi sem byggist á áhuga barnanna undir stjórn og í samstarfi við félagsmiðstöðvarráðið. Að auki eru á dagskrá viðburðir sem fara líka fram utan Reykhóla og utan almenns opnunartíma, ásamt samstarfsverkefnum.

Samstarf

Félagsmiðstöðin í Reykhólahreppi er í samstarfi við félagsmiðstöðvarnar í Dalabyggð og Strandabyggð, sem jafnframt þjónustar börn úr Kaldraneshreppi. Samstarfið er ætlað börnum á mið- og unglingastigi í þessum sveitarfélögum. Yfir skólaárið verða sameiginlegar opnanir í hverju sveitarfélagi fyrir sig, auk þess sem viðburðir verða skipulagðir í sameiningu og tekið þátt í utanaðkomandi viðburðum saman.

 

Markmið samstarfsins er að styrkja tengsl á milli barna í þessum sveitarfélögum, stækka tengslanet þeirra og efla vináttu þvert á sveitarfélagamörk.

Fastir viðburðir

Aðalviðburðir miðstigs:

  •         Jólaballið – Haldið í desember ár hvert (samstarfsverkefni nágrannasveitarfélaganna).
  •         Miðstigsballið – Haldið í maí ár hvert (samstarfsverkefni nágrannasveitarfélaganna).

 

Aðalviðburðir unglingastigs:

  •         Ungmennaþing Vestfjarða – Haldið í september ár hvert.
  •         Landsmót Samfés – Haldið í byrjun október ár hvert.
  •         Æskulýðsballið – Haldið í nóvember ár hvert.
  •         Sam Vest – Haldið í febrúar/ mars ár hvert.
  •         Samfestingurinn – Haldinn í byrjun maí ár hvert.

 

Nákvæmar upplýsingar um alla viðburði og starfsemi utan almenns opnunartíma verða sendar foreldrum í tölvupósti tímanlega.

Íþróttastarf

Íþróttastarf er unnið af ungmennafélagið Aftureldingu. Boðið er upp á fjölbreytta hreyfingu fyrir börn á öllum aldri sem tekur mið að áhugasviði barna.

Lýðræði

Dagskrá félagsmiðstöðvarinnar og íþróttaæfingar er sniðin að óskum barna og sjá áhugasöm börn og ungmenni um skipulag og utanumhald. Félagsmiðstöðvarráð er skipað þeim börnum sem hafa áhuga á að taka þátt í mótun dagskrár og er ekki kosið í ráðið sérstaklega.

Ungmennaráð Reykhólahrepps er hluti af stjórnsýslu Reykhólahrepps og kjósa ungmenni sér fulltrúa í ungmennaráð á ungmennaþingi annaðhvert ár. Ungmennaráðið fundar reglulega og heldur eitt ungmennaþing á ári. Umræðuefni ungmennaþinga eru skipulögð af ungmennaráðinu.